「2024三義雲火龍節」愛在5月18號到6月3號在五榖宮、天后宮、關聖宮、十六份車頭、三義河川加蓋廣場盛大舉辦！「三義雲火龍節」自2007年由三義鄉雙潭社區啟發草創、三義觀光文化發展協會等民間社團抽間大力推廣，這項客家獨有个傳統民俗，在中央、地方同民間个共同打拚下，既經分三義雲火龍節打下紮實个基礎，行入第18隻年頭，也慢慢仔得著國人个關心，這下既經成為客庄節慶文化中个重要指標，邀請大家共下感受在地个文化魅力。
「2024三義雲火龍節」秉持敬天惜福个精神，持續辦理請神迎龍、開光點睛、化龍返天這兜客家傳統个祭祀科儀，用誠摯个態度表達對信仰同雲火神龍个敬重，結合在地社區居民用禾桿編製雲火龍摎跈龍遊庄頭个節慶歡喜，為三義祈福，分世界看著國際慢城个能量，還較將這活動打造成「旅外遊子一定愛轉鄉參加」个重要慶典；在傳承方面，由三義優秀演藝團隊──客演舞集擔任晚會開場嘉賓，融合《雲火龍》繪本故事情節進行編舞，同山林、田坵个元素相對答，同三義常年雲霧繚繞个景色相輔相成，顯現雲火龍毋單只係文學，也係做得轉譯做舞蹈藝術還過原汁原味企上大舞台，提升客家文化个深度同闊度，繼續向國際化邁進，分這節慶做得永續傳承。
另外，也愛同在地信仰結合創意元素，延續辦理「神龍謁聖」、「跌聖筊比賽」、「醉龍體驗活動」等系列計畫，營造民俗同節慶相融合个熱鬧氛圍，再藉由「雲火龍活動攝影比賽」，分散布各地个攝影好手做得用雙目同相機，探訪傳統个脈絡軌跡，捉著隆重个儀式、舞動个神龍、趣味个體驗、精彩个表演這兜經典畫面，帶領社會大眾從影像美學認識客家文化，追尋國際級慢城藝術。
5月25號三義雲火龍節主活動暨晚會隆重登場，下晝頭2點開始展開系列个活動項目：音樂社團表演、跌聖筊比賽、醉龍體驗活動，續等在下晝頭5點起勢係由三義雙潭社區同三義龍藝等相關團體組成陣容龐大个跈龍遊庄頭；晚會自暗晡頭6點30分開始，由客演舞集以融合三義雲火龍同創新律動元素个「話說雲火龍」做為開場舞碼，掀起第一波高潮，還有閩南語金嗓歌王──蔡佳麟、客家創作才子──陳瑋儒、國際絲竹饗宴──紅如樂團等超級唱將帶來高水準个演出，加上萬眾矚目个全民瘋摸彩，分參與觀眾試手氣，共同見證總價值超過8萬銀个豐富好禮獎落誰家，千萬毋好錯過！
三義鄉長呂明忠表示，三義鄉係客家委員會公告个客家文化重點發展區，屬於傳統客家聚落，鄉內个客家人口約佔84%，長期配合中央部會同地方政府推動客語政策，在語言同文化傳承推廣方面緊創佳績，「106-107年度促進地方客語整體發展計畫」獲得乙組佳等、108-111年度「推動客語為通行語成效評核」連續四年榮獲優等，112年度更上一層樓突破自家，榮獲「特優」殊榮，展現出在地堅強个客家民族性同強大个發展潛力。鼓勵公所同仁報考客語能力認證，期望用領頭羊个角色帶頭參與，發揮示範作用，落力煞猛推廣客家文化傳承工作。
為著愛分活動順利舉行，三義鄉公所盡地主之誼，戮力同心辦理，歡迎全國朋友共下來三義尞（一起來三義玩），藉由參與節慶活動，深入認識在地文化个內涵，感受觀光產業个深度與質感。各項活動詳情請上「三義雲火龍節」FB粉絲專頁：https://www.facebook.com/sanyifiredragon